Þakka þér fyrir Sigurður.

Mig langar í örfáum orðum að þakka Sigurði Einarsyni fyrir að gefa sér tíma frá önnum sínum erlendis til að koma að heiman frá sér til Íslands til að hjálpa Sérstökum Saksóknara að glöggva sig á nokkrum vafaatriðum sem alltof lengi hafa verið að vefjast fyrir mönnum hér á landi. Ekki það að þetta hafi nokkuð með Sigurð sjálfan að gera enda segist hann vera saklaus af öllu sem heitir saknæmt athæfi. Sigurði mun ekki hafa hugnast, ja allt að því óeðlilegan áhuga Sérstaks Saksóknara, á að bjóða honum í heimsókn til lengri eða skemmri dvalar enda mun Sigurður vanur því að ráða sínum ferðum sjálfur og ekki síður ráða sínum næturstað. Samkvæmt fréttum mun Sérstakur Saksóknari hafa verið tilbúinn að kosta gistingu og uppihald þann tíma sem Sigurður dveldi hér á landi en á það mátti Sigurður ekki heyra minnst enda vanur að borga fyrir sig sjálfur.

Þarna stóð semsagt hnífurinn í kúnni en þetta mun síðan hafa verið leyst í mesta bróðerni þannig að Sigurður fær að halda sér uppi sjálfur og jafnvel ákveða sjálfur hvenær hann er farinn að níðast á gestrisni íslendinga og koma sér þá heim. Vonandi þarf þá Sérstakur Saksóknari ekki að endurnýja heimboðið seinna. Þá er nú ekki víst að jafnvel standi á hjá Sigurði og gæti þá langur tími liðið þar til glufa opnast aftur í þétta dagskrá hans til að sinna þessu kvabbi frá gamla landinu.

En semsagt, Sigurður á heiður skilið fyrir að koma hingað upp og afgreiða þetta smámál sem mönnum hér virðist þó svo mikið í mun að fá á hreint. Kannski er ekki öll von úti með að svör fáist frá fleirum sem skift hafa um föðurland ef þeir hafa fordæmi Sigurðar fyrir sér.

Athugasemdir

[Eyjólfur Jónsson, 19.8.2010 kl. 16:51]

Sæll Hjalti minn þú lýsir þessu ansi vel og eru sennilega allir sammála þér í öllu nema þetta með sjónvarp á fimmtudögum, það verður að vera sjónvarp eða minnsta kosti barnatíminn!